Gege Bade-Birmenstorf hän mir an dr Heimrundi verlore und uns welle revanchiere;
Das isch au fascht glunge, doch zem Schluss hän mir ihne für e Unentschiede miesse gratuliere..

Vor dr Pause emol in Front gsi denn aber mit 4:2 hinde;
Hän mir uns in dr zwaite Hälfti unbedingt nomol welle finde.

Es isch uns guet glunge und mir sin sälber fascht gsi verdrosse;
Wie mir plötzlich hän Goal für Goal gschosse!

Mit 6:4 sin mir Vorne gsi bis kurz vor Spieländ und hän dä Vorsprung rächt guet könne verwalte;
Do isch am Gegner in Sinn koh: Si könnte dr Hebel au nomol umschalte…

Mit vier Fäldspieler hän si denn no zwaimol troffe und uns könne e Punggt ablugse;
Mir hän ihne dr Ball eifach nümm könne abnäh – Das duet uns scho rächt fugse.

Gege Spreitebach isch’s in de erschte Minute nit schlächt gange;
Doch mit em 5:1 Rückstand zur Pause hän unseri Fans miesse bange…

Aber mir sin noch dra gsi am Usgliich und hän im Abschluss au Päch gha;
Und drumm hän mir mit toller Moral in dr zwaite Hälfti zaigt – Mir bliibe dra!

Au noch em 6:1 für dr Gegner hän mir uns immer nonig ufgäh;
D’Spreitebacher aber sin nervös worde und hän sich fascht no dr Sieg lo näh…

In dr effektive Spielzyt hän mir drumm no bis zum 5:6 könne verkürze;
Doch au e knappi Niederlaag loht uns in dr Tabälle leider e Platz wyter abe stürze…

Jetzt kunnt d’Fasnachts-Pause und mir könne uns nomol neu sammle;
Hoffentlig mien mir denn an dr letschte Rundi nüt me vo wäge Abstieg stammle!