Me het kai Prophet miesse si zum wüsse oder z’gseh;
Dass sich die vor uns plazierte nit no zwai Mol zwai Pünkt löhn lo neh.
Mir hän Das wo mir uns vorgnoh hän im erschte Spiel guet könne umsetze;
Nämlig uf e gueti Defensive setze und vorne kaltblietig iinetze…
Trotz e paar Gegeträffer in de letschte Minute het’s glängt;
und mir hän dänggt: Zum Glück hän uns d’Oekinger nit überholt und uns no meh noch hinde verdrängt!
S’Fazit vo dämm Teil vom Bricht:
Mir hän vorne einigi ineghaue und sin hinde wie immer gsi nit ganz dicht….
9:5 gwunne!

Noch dämm d’Schüpbacher, s’isch gar kai Lacher, gwunne hän ihre erschti Match;
hän mir’s denn gege d’Cannibale e Bitz loggerer gnoh und gmacht no e glatte „Quatsch“.
Denn mir hän gwüsst mir könne dr Ligaerhalt definitiv nümmi schaffe;
und drumm het dr Thierry nit wölle vom Bänkli us zuegaffe.
Dr „Papa“ Bretscher isch denn gstande zwüsche de Pfoschte und het si Part guet erfüllt;
und dr Thierry isch denn für das Spiel gsi imene Trickot ighüllt!
Fascht hätt är denn uf e Bass vom Beckaroni no s’Balleli ihneglobbt;
doch er het denn au emol dörfe gspüüre, wie’s isch, wenn eim dr gegnerischi Goali fobbt…
Mit däne zwai Vierer-Blögg isch’s denn am Schluss gsi e uf und ab;
und dr Sieg isch schlussändlig verpasst worde au nur ganz knapp.
D’Cannibale hän kurz vor em Abpfiff no könne usgliiche;
so hän mir z’letscht noch e paar vegäbene Chance halt no e Punkt miesse striiche…
S’Fazit vom letschte Bricht:
Au mit beide Goalie uf em Fäld isch es nit garantiert;
dass me am Schluss kaini fuule Goal no kassiert…
5:5 vergwunne (gwulore)

Gspiilt hän: Tierry; Thomas; Beat(C); Lukas; Marc; Adrian; Samuel; Stefan (s’letschte x gsi)
Daniel

No e glaine Rückblick:
Losgange isch’s gege Gurgethal, am Schluss isch dä Match gsi e richtigi Quahl.
Denn e hoche Sieg gege Herzogenbuechetee; aber an dr näggschte Maischterschaftrundi druffaabe mit ere lausige Leischtig gege Lion vo Oensige und d’Lütergoofe sin mir untergange wie d’Nitschwimmer im See.
Mir sind denn gsi ganz unde und hän im verschnaite Heim (iswil);
widr gfunde unser erfolgriichs Spiel.
Vier Pünkt het’s gäh gege d’Oekinger und d’Cannibale;
ab dört isch’s ufwärts gange, ohni das mir im Schiri öppis hän miesse zahle.
Denn au in Oenisge bi de Leue dehai;
hän mir nomol Pünkt gholt widr zwai mol zwai.
Kai Ahnig wieso, aber ich hör jetzt do am beschte uff mit resumiere;
und möcht an däre Stell, allne wo dr Ligaerhalt gschafft hän, gratuliere!

S’Fazit no vo dr Saison 08/09:
Ob fünfte oder letschte bisch in dr Tabälle spiilt eigentlig kai Rolle;
s’isch fascht e Wunder, mien mir die gsammlete Pünkt nit no irgenwie verzolle! 😉

E Gruess an alli wo s’gläse hän. Mäld mi widr vor dr näggschte Rundi.
Bis denn verbring ich mini Ferie bim Heinz vo Mainz , spiil e weneli Golf mit em Rolf und gang no e Desert go neh mit dr Dorothee..