UHC Riehen – TSV Unihockey Deitingen II 7:5 (2:4)
Heimstark hän mir welle si und sin mit drei Blögg ins Spiel gstartet;
Mir hän denn aber au rächt lang mit em Goalschiesse abgwartet…
Denn zerscht het’s Deitige besser gmacht mit Chance usnutze;
Mir hän aber nit welle ufgäh und das gar nit kenne verputze.
Kuum hän mir aber denn ändlig troffe und widr dörfe hoffe;
Het dr Schosch kurz vor dr Pause s’Muul gha wyt offe
Dr Gegner het nämlig grad kurz vor dr Pause no s‘ 4:2 druffgleggt;
Das het uns Alli, wohrschihnlig au unseri Fans, scho rächt ufgreggt
Nichts desto trotz sin mir Positiv in die zwait Hälfti gstartet und hän alles probiert;
Und dr Schorsch het denn ohni Timeout während em Spiel uf zwai Linie optimiert
Gli druff abe, s’isch nit lang gange, het die Massnahm denn welle griffe;
Dr Schiri het denn no fünf Mol -wäg eme Goal für uns- dörfe piffe
So hän mir also dä Match no kehrt und kenne gwinne mit 7:5 Goal;
S‘Abschiegsgpängscht isch drmit verschwunde, dämm is bi uns nit wohl..

UHC Riehen – Burning Fighters Ziefen 9:9 (2:5)
Emol verschwunde heisst leider nit, dass es nie meh kunnt unser „Gschpängscht;
Sin ächt am Einte oder Andere doch d’Hoor z’Bärg gstande wäg gwisse Ängscht
Mir sin nit schlächter gsi nai, aber unseri Schüss sin am Afang eifach widr nit iine;
Ziefe het noch em Motto könne spiile: jeder Schuss ein Treffer, s’sich gsi zum griine
Nochem Luc sim Aaschlussträffer, ich glaub s’isch zum 1:4 gsi, hän mir widr agfange hoffe;
S’het denn aber nur no dr Schorsch und sone ziefener Burning Fighter ins Goal troffe..
Im Timeout no kurz vor dr Pause isch’s no e weneli luter worde als normal;
Es isch nomol e“Weckruef“ gsi an uns alli und nit ebbe e Qual, nai s’richtige Signal
Zwar het’s noch dr Pause nomol eins ufs Dach gäh, aber mir sin eimol mehr ufgstande;
Und hän vorallem in de letschte 10 Minute bewiise, es isch bi uns e riesigi Moral vorhande
Plötzlich hän d’Bäll nur no bim Gegner zapplet im Netz und mir hän guet Druck gmacht;
E spannende effektivi Spielzyt isch’s gsi mit beidsiitig viile Aktione, nit immer durchdacht;-)
Völlig offe isch’s gsi bis ganz am Schluss und beidi Teams hän no Mögligkaite gha zum gwinne;
Wenn öbber vor dämm Spiel gsait hätt, s’Spiil goht mit 9:9 us, hätt ich gsait är wurd spinne
Mir hän das Unentschiede, wo sicher grächt isch über’s ganze Spiil gseh, guet kenne aktzeptiere;
Denn immer widr ufhole, Moral zaige und dra glaube bis zem Schluss: Do kam e nur gratuliere!

Fazit:
Mit de drei Pünggt wo mir gholt hän an dr Heimrundi, dangge nomol an d’Verstärkig vo de A-Juniore;
Könne mir uns an dr letschte Rundi nur o sälber schloh und hän drumm in dr 4.Liga sicher nüt verlore