Gege Ziefe isch’s z’erscht nit guet gloffe;
doch noch eme 0-2 het denn dr Marc troffe.

S’isch immer besser gange und siehe da:
plötzlich hän mir e 4:2-Vorsprung gha.

In dr zwaite Hälfti het’s no welle digger koh, denn mir hän mit guete Kombinatione;
uns mit de erschte beide gwunnene Pünggt könne belohne…

Mit „nur“ zwai Blögg hän mir somit e sehr gueti Laischtig könne bringe;
und dr gegnerischi Goalie no viermol könne bezwinge.

Klar, mir hän für unseri Verhältnis e überdurchnittlich gueti Effiziänz an Tag könne lege;
und dr Tierry het sich im Kaschte au oft. aber gekonnt, dörfe bewege.

Im grosse und ganze, es isch nit gspunne;
hän mir s’erschte Spiil verdient gwunne.

Vom zwaite Match hani übrigens nur ghöre saage;
vo dämm git’s halt leider mehr z’jommere und z’klaage…(Ouuuh, mi Maage)

D’Niederlaag gege dr UHC Weh(ntal Regenstorf II) het allne vo uns e Bitz weh gmacht;
Denn dr einti oder anderi Gegner bi uns in dr Gruppe het sich sicher e weneli ins Füschtli glacht.

No kai Team het gege Die Pünggt ligge loh;
drumm hän mir dänggt:
E Vorwiehnachtsgschängg macht Die froh 😉

D’Laischtig isch sicher nit gsi z’vergliiche mit em erschte Match;
E paar hän schihns gspiilt amigs e fertige quatsch…

Und doch sin mr sogar emol gsi am fiehre;
hän aber denn Sekunde vor Schluss gliich no „miesse“ verliere.

Sicher könne mir für’s näggschte Mol uf dr Wääg mitnee;
Mängmol wär au e Unentschiede zem Schluss ganz okee!

Scheeni Feschtdääg und e guete Rutsch wünscht euch dr Schorsch;
Är hofft: S’isch im neue Joor bi kaim vo euch dr Stock morsch 😉