Mir sin konzentriert gstartet und hän bald gueti Torchance usegspiilt gha. Dr Claudio het denn im „Junioreblogg“ emol agfange vorlege. De „ältere“ Spieler het im ganze erschte Drittel vorallem im Abschluss allerdings leider nüt zellbars welle glinge. Es isch denn jedefalls mit eme z’knappe 4:2 für uns in die erschti Pause gange.

Im zwaite Drittel, wo denn au dr Simon Häberle ändlig e Glägeheit het könne verwärte, hän denn beidi Mannschafte ihri Scores verdopplet. Scho denn het übrigens dr Gegner agfande sini Bierfläsche z’öffne…

Mir sin sälbschtverständlig au im letschte Drittel bim Wasser bliibe. Doch do no viili Goal für uns gfalle sin, dörf denn dr Dominik no mindeschtens Eine usgäh 😉 Är het nämlig s’zähnte und zwanzigschte Goal für uns erziilt. Au unsere langjährige Topscorer Marc Spitzli, widr dr Claudio Strickler und dr Simon Häberle sin einigi Mol erfolgriich gsi. Nit z’vergässe au dr super Isatz vom Mario Müller, wo au zweimol töpft het und dr Tony Thai, wo sit sim Zuegang zue uns tolli Vorschritt gmacht het.

Trotz aller Freud über dä insgesammt glungeni Göpp-Uftritt, isch sicher nit alles optimal gloffe für uns in dämm Match. Insbesondere vom zwaite Blogg het vorallem im Abschluss d’Qualität und s’Timing bim passe oft gfählt. Au nit z’vergässe isch, dass d’Wohlener mit numme fünf Fäldspieler äträtte sin. No z’erwähne git’s usserdämm, dass dr Schiri in däre sehr faire Partie kai einzigi Zwaiminute-Stroof het miesse pfiffe.
Guet, Wohle het sich eigentlig scho vor em letschte Drittel uffgäh und so isch d’Gegewehr denn au entsprächend gring gsi in de letschte zwanzig Minute. Mir hän mit dämm aber natürlig kai Problem gha und eso schnäll bald alles klar gmacht…

Jetzt dörfe mir uns uf e sicher grösseri Härusforderig im 1/64-Final freue!